Tuesday, August 4, 2009

ابنك حزين يا أمي


ابنك حزين يا أمي



04/08/2009
كتب عزت عزيز حبيب المحامي
ابنك بيصرخ يا أمي , حزين وهوه في حضنك. أبنك بيصرخ, حزين عليكي وعلي ولادك أللي نسيتيهم .. قالوا له في دستورهم انه مواطن ذي غيره لكن يا أمي هو حاسس بانه منبوذ وهو في حضنك.. ابنك بيصرخ علي أخواته اللي ماتوا في عصر السادات من الزاوية للخانكة اللي ماتوا فيها المئات وكذب عالعالم لكن ربنا أعطاه جزاته.. وأنا حزين علي أولادك بالكشح اللي قتلوهم لانهم بيحبوا مسيحك يا أمي .. شوفتي صورة ميسون يا أمي؟ ميسون بنتك عمرها حداشر سنه طبعا انتي عارفاها طبعا لأنها بنتك.. شوفتي عملوا فيها ايه يا أمي ؟ مزقوها بالسكاكين والسيوف !! ايه اللي عملته ليذبحوها عالمكشوف؟؟ عارفه يا أمي ان ميسون خافت منهم وجرت واترمت في حضن أخيها عادل فجري وراها المتوحشين وقتلوهم همه الاتنين .. شوفتي ليه انا باصرخ.. انا مش بأصرخ لان ميسون وعادل وسامية وعبد المسيح وعمدان ورفعت وتادروس وناصر ومعوض ولبيب وممدوح وحليم وزكريا وجابر و بونا ووائل و وهيب وعاطف أستشهدوا لكن حزني يا أمي علي اللي بيسموهم قضاه برئوا المتوحشين يا أمي!!
وتستروا عليهم ! واحد وعشرين من ولادك يا أمي ذبحوهم كالخراف والأمن شايفهم والعدالة غمضت عنيها عنهم ليه يا أمي ؟ معقوله يا أمي لانهم مسيحيون؟ تصدقي كل ده يا أمي؟؟ عارفة يا أمي لما شوفت صورة ميسون ووجها ممزق وشقوا جسدها الرقيق بالسيوف صرخت يا امي وبكيت لان ده مش يمكن يكون طبع الحيوانات المتوحشه..حتي عمي جابر سدراك يا أمي ما رحمهوش رغم عمره اللي تعدي خمسه وتمانين سنه ,. يرحموه كيف يا امي وهمه لا يعرفوا أيه هيه الرحمه..؟؟ سمعتي عن عمي نصحي يا أمي؟ عمي نصحي ده من أسكندرية دخل عليه واحد عاقل بعد ما لف كل الحته يبحث عن الكنائس ليقتل ويذبح وهوه مطمن ان الشهاده جاهزه انه مش عاقل!! ودخل قتل عمي نصحي وجاء المحافظ وهوه مجهز شهاده تقول ان القاتل مش عاقل ذي ما بيقولوا كل مره يا أمي !! قتلوه وهو بيصلي في جمعة ختام الصوم.. طيب سمعتي عن عمي كمال هوه والطفل جرجس في العديسات؟ يوم الآربع تمنتاشر يناير سنة ألفين وسته سمعنا كلام قاله الضابط الكبير احنا مش جايين نحميكم ده احنا جايين نمنعكم من الصلاة!! شوفتي يا أمي الصلاة بقيت جريمة بتيجي الحكومة علشان تمنع عنها عبيدك وتسيب الوحوس تقتل في اللي بيصلوا ومات كمال ومعه الطفل جرجس .. قتلوهم بالجنازير والعصي لانهم بيصلوا لمسيحهم !! طيب سمعتي يا أمي عن سعد كامل شحاته اللي من قرية كوم اللوفي بسمالوط منيا لما هدوا له بيته وحرقوه يوم سته وعشرين أكتوبر ألفين وسته لان جيرانه قالوا ده جايب ناس وبيصلوا فيه!! شوفتي يا أمي الصلاة بقي جريمه كيف؟ ها أقولك ايه ولا ايه يا أمي ده انا لو حكيت لك مش ها أخلص وانا مش عايز اشيلك همومي وحزني وألمي وظلمي لكن لازم أقولك علي ولادك أللي قتلوهم في جيشك وهمه بيخدموكي بقلبهم !! طبعا سمعتي عن هانى صاروفيم نصر الله من قرية الرحمانية قبلى بلد مركز نجع حمادى محافظة قنا - كان مجندا بالمنطقة الجنوبية باسوان - بالوحدة رقم 2152-ج-33 اللي في أربعه أغسطس الفين وسته قتله القائد لانه رفض ينكرمسيحه الحي القدوس وبعد ما قتله يا أمي حرقه _ايوه حرقه يا أمي – ورماه في النيل شوفتي يا أمي الوحوش البشرية بتعمل ايه؟ عارفه يا أمي الطب الشرعي قال انه تحلل ومش ها يقدروا يعرفوا سبب الوفاة أيه !!! وطبعا سمعتي عن جرجس رزق يوسف مقار اللي كان عمرة عشرين بالتمام ده من القوصية محافظة اسيوط يعني صعيدي كمان وهو برضه مجند بمركز تدريب مبارك طريق السويس .. جابوه لأبوه قتيل بعد خمستاشر يوم بس من تجنيده وقال ايه يا أمي عنده قال أنيميا ومات بسببها في القطر وهوه جاي لكن مزلاته شافوه وهوه بيضربوه في المعسكر .. لكن أنا يا امي عرفت انه أنضرب في خصيتيه واللي شافوه شهدوا عليه وقالوا نجيب الطبيب الشرعي يكشف عليه وقدمنا طلبنا لكل الجهات في القوصية واسيوط وكل النيابات ولغاية دلوقيت يا أمي أحنا منتظرين لكن تقرير هاني صاروفيم كان شامل جرجس كمان ..حتي كهنتك يا أمي ورهبانك ما رحمهمش الأرهابيين كمان .. في يوم السبت واحد مايو ألفين واربعه جاء ضابط برتبة ملازم اسمه أحمد الكيلاني وقبض علي ابونا أبراهيم ميخائيل والشمامسه اللي معه لانهم بنوا سور الكنيسه أللي كان متهدم!! تصدقي يا أمي ان الضابط ألقي بهم بالترعة وأستشهد ابونا ابراهيم ومعاه الشماس/ محروس ميلاد شيحة والشماس/ ناصر فهيم بسخيرون؟؟ ليه يا أمي كل ده يحصل من ناس غريبه عنكي لولادك الأصليين أللي بدم أبائهم وجدودهم ارتوت أرضك؟ ها اقولك ايه ولا ايه ومش ممكن انسي أبونا بنيامين وابونا أغابيوس اللي قتلوهم علي باب دير المحرق يوم الجمعه اتناشر مارس ألف وتسعمائة واربع وتسعين وقتلوا معاهم تلاته من خيرة شبابك !! طبعا مش ها أنسي شهدائك بأبو قرقاص وصنبو وديروط والقوصية والعياط جيزه ومنشاة دملو وسمالوط ومش ممكن أنسي أبي القمص مكسيموس جرجس الذي رفض أن ينكر سيده، فنال إكليل الشهادة في 17 نوفمبر1981 والقس شنودة حنا عوض بالنوبارية وفي طما وفي منفلوط شهداء كثيرون مش ها ننساهم أيضاً، ومش ها ننسى سامي يعقوب ميخائيل من تجار مير مركز القوصية أسيوط الذي رفض دفع الجزية فقتلوه هو وولديه أمير العريس منذ شهرين وعجيب ولديه سبعة أولاد. وهل ننسى شهداء عزبة الأقباط بالبداري والتي نال فيها سبعة من خيرة شبابها أكاليل الشهادة؟ وشهداء ببلاو لن ننساهم أيضاً ومش ها ننسي الدكتور صبحي بخيت منقريوس الذي استشهد أمام زوجته و أطفاله أبرام ومينا ومرنا. مش قلت لك يا امي مش ها اقدر اقولك علي كل اللي جوايا؟ ده عدد شهدائك كتير قوي يا أمي وياريت يسامحوني لاني مقدرتش اذكرهم كلهم.. شوفتي انا حزين كد ايه وليه يا أمي؟ حزين علي أخواتي اللي راحوا وعلي بلدي اللي نخرها سوس التعصب والكراهية وفتك بيها مرض العنصريه اللعين.. سأبقي حزين يا أمي عليكي كمان وهاورث حزني لولادي من بعدي لو ما صحيتيش يا أمي ودستي برجليكي علي أللي بيقتلوا ولادك!!؟ سابقي حزيناً ومش ها أسيبك أبداً يا امي وسأروي ارضك بدمي ذي ما جدودي رووها من قبلي..

1 comment: